ସାମାନ୍ୟ ଟଙ୍କା କାରବାର ବିବାଦକୁ କେନ୍ଦ୍ର କରି ଜଣେ ଯୁବକଙ୍କୁ ଛୁରିରେ ଗଳା କାଟି ନିର୍ମମ ଭାବେ ହତ୍ୟା, ୨ ଅଭିଯୁକ୍ତ ଗିରଫ

ରେଙ୍ଗାଲିକ୍ୟାମ୍ପ :ବରଗଡ଼ ଜିଲ୍ଲା ଅତାବିରା ଥାନା ଅଞ୍ଚଳରେ ନିର୍ମମ ହତ୍ୟା ଘଟିଯାଇଛି। ସାମାନ୍ୟ ଟଙ୍କା କାରବାର ବିବାଦକୁ କେନ୍ଦ୍ର କରି ଜଣେ ଯୁବକଙ୍କୁ ଛୁରିରେ ଗଳା କାଟି ନିର୍ମମ ଭାବେ ହତ୍ୟା କରାଯାଇଛି। ମୃତ ଯୁବକ ଜଣକ ହେଲେ ଅତାବିରା ବସ୍ତିର ଶିବା ବିଶ୍ବାଳ (୨୩)। ଏହି ଘଟଣାରେ ପୁଲିସ ତୁରନ୍ତ କାର୍ଯ୍ୟାନୁଷ୍ଠାନ ଗ୍ରହଣ କରି ୨ ଜଣ ଅଭିଯୁକ୍ତଙ୍କୁ ଗିରଫ କରି କୋର୍ଟ ଚାଲାଣ କରିଛି। ସେମାନଙ୍କ ଠାରୁ ଏକ ଛୁରା ମଧ୍ୟ ଜବତ କରିଛି।
ଗିରଫ ଅଭିଯୁକ୍ତ ଦ୍ବୟ ହେଲେ ଭୋଇପୁରାର ଦୀପକ ପଞ୍ଚମ (୨୨) ଓ ଘସିଆପଡ଼ା ର ସାହିଲ ଡୁଙ୍ଗୁରି (୨୩)। ଘଟଣାରୁ ପ୍ରକାଶ ଯେ, ଅତାବିରାରୁ ଭୋଇପୁରାକୁ ସଂଯୋଗ କରୁଥିବା ରାସ୍ତାର ପୋଲ ନିକଟରେ କିଛି ଟଙ୍କା ନେଣଦେଣକୁ କେନ୍ଦ୍ର କରି ଶିବା ଏବଂ ଅଭିଯୁକ୍ତ ଦ୍ବୟଙ୍କ ମଧ୍ୟରେ ବଚସା ଆରମ୍ଭ ହୋଇଥିଲା। ଟଙ୍କା ମାଗିବା ବେଳେ ଗାଳିଗୁଲଜ ହେବାରୁ ପରିସ୍ଥିତି ଉତ୍ତେଜନାପୂର୍ଣ୍ଣ ହୋଇ ମାରପିଟ୍‌ର ରୂପ ନେଇଥିଲା। ଏଥିରେ ଉତ୍ତ୍ୟକ୍ତ ହୋଇ ଦୁଇ ଅଭିଯୁକ୍ତ ଏକ ଧାରୁଆ ଛୁରିରେ ଶିବାଙ୍କ ଗଳା କାଟି ଦେବା ସହ ତାଙ୍କ ଶରୀରର ବିଭିନ୍ନ ସ୍ଥାନକୁ ନିର୍ମମ ଭାବେ ଭୁସି ଦେଇଥିଲେ। ଆକ୍ରମଣ ପରେ ଶିବା ରକ୍ତ ଜୁଡ଼ୁବୁଡ଼ୁ ଅବସ୍ଥାରେ ଘଟଣାସ୍ଥଳରେ ପଡ଼ି ରହିଥିଲେ।
ଖବର ପାଇ ଅତାବିରା ପୁଲିସ ତୁରନ୍ତ ଘଟଣାସ୍ଥଳରେ ପହଞ୍ଚି ଗୁରୁତର ଅବସ୍ଥାରେ ତାଙ୍କୁ ଉଦ୍ଧାର କରି ଅତାବିରା ଗୋଷ୍ଠୀ ସ୍ୱାସ୍ଥ୍ୟ କେନ୍ଦ୍ରକୁ ନେଇଥିଲା। ତେବେ ସେଠାରେ ଡାକ୍ତର ତାଙ୍କୁ ମୃତ ଘୋଷଣା କରିଥିଲେ। ପରେ ଶବ ବ୍ୟବଚ୍ଛେଦ ପାଇଁ ଖେଦାପାଲି ଡାକ୍ତରଖାନାକୁ ପଠାଯାଇଥିଲା।