ମଧ୍ୟପ୍ରଦେଶ ମର୍ମନ୍ତୁଦ ସଡକ ଦୁର୍ଘଟଣାରେ ଚାଲିଗଲା ୭ ଓଡିଆଙ୍କ ସହ ୮ ଜୀବନ

ଭୁବନେଶ୍ୱର : ମଧ୍ୟପ୍ରଦେଶରେ ଚାଲିଗଲା ୭ ଓଡିଆଙ୍କ ସହ ୮ ଜୀବନ। ଅଧାବାଟରେ ଜଗି ବସିଥିଲା ମୃତ୍ୟୁ। ନାଳ ପାର୍ ବେଳେ କାର୍ ଭାସି ଯାଇ ୨ ମହିଳା, ୩ ପୁରୁଷ ଓ ୩ ଶିଶୁଙ୍କ ଜୀବନ ଚାଲିଯାଇଛି। ନାଲଖେଡା ଜିଲ୍ଲାର ମା’ ବଗଳାମୁଖୀ ମନ୍ଦିର ନିକଟରେ ଏକ ପ୍ରଖର ସ୍ରୋତ ଥିବା ବର୍ଷା ଜଳ ଭର୍ତ୍ତି ନାଳରେ କାର ଭାସି ଯାଇ ଏଭଳି ଅଘଟଣ ଘଟିଥିବା ନେଇ ଶନିବାର ଖବର ମିଳିଛି। ଦୁର୍ଘଟଣାରେ କାରରେ ଥିବା ଆଠ ଜଣଙ୍କର ମୃତ୍ୟୁ ହୋଇଛି। ମୃତକଙ୍କ ମଧ୍ୟରେ ତିନି ଜଣ ଶିଶୁ, ଦୁଇ ଜଣ ମହିଳା ଏବଂ ତିନି ଜଣ ପୁରୁଷ ଅଛନ୍ତି। ସମସ୍ତ ମୃତକ ଓଡ଼ିଶା ଭୁବନେଶ୍ୱର ଜୟଦେବବିହାରର ବାସିନ୍ଦା ବୋଲି ଜଣାପଡ଼ିଛି। ଗାଡି ଚାଳକ, ୭ ଓଡିଆଙ୍କ ମଧ୍ୟରେ ପୁଅ, ନାତି, ନାତୁଣୀ, ଝିଅ, ଜ୍ୱାଇଁ, ନାତୁଣୀ, ଅବିବାହିତ ଝିଅ(କିଛି ଦିନ ପରେ ହୋଇଥା’ନ୍ତା ରିଙ୍ଗ୍ ସେରିମନି), ପରିବାର ଅନ୍ୟ ସଦସ୍ୟ ମଧ୍ୟ ମୃତ।
ସୂଚନା ଅନୁଯାୟୀ, ଶ୍ରଦ୍ଧାଳୁମାନେ ନାଲଖେଡାର ମା’ ବଗଳାମୁଖୀ ମାତା ମନ୍ଦିର ଦର୍ଶନ ପାଇଁ ଉଜ୍ଜୟିନୀରୁ ଏକ ଟ୍ୟାକ୍ସି ଭଡ଼ା କରିଥିଲେ। ଦର୍ଶନ ପରେ ଫେରୁଥିବା ସମୟରେ ପ୍ରବଳ ବର୍ଷା ଯୋଗୁଁଁ ମନ୍ଦିର ନିକଟରେ ଥିବା ବର୍ଷା ଜଳ ନାଳରେ ପ୍ରବାହିତ ହୋଇଯାଇଥିଲା ଏବଂ ପ୍ରବଳ ସ୍ରୋତରେ କାରଟି ଭାସି ଯାଇଥିଲା। ଦୁର୍ଘଟଣା ସମ୍ପର୍କରେ ସୂଚନା ପାଇବା ପରେ ପ୍ରଶାସନିକ ଅଧିକାରୀ ଏବଂ ଏକ ଉଦ୍ଧାରକାରୀ ଦଳ ଘଟଣାସ୍ଥଳରେ ପହଞ୍ଚିଥିଲେ। ବହୁତ ଚେଷ୍ଟା ପରେ, ନାଳରୁ କାରଟିକୁ ବାହାର କରିଥିଲେ। କାରରେ ଥିବା ସମସ୍ତ ଆଠ ଜଣଙ୍କର ମୃତ ଦେହ ଉଦ୍ଧାର କରାଯାଇଥିଲା। ପୁଲିସର ପ୍ରାଥମିକ ତଦନ୍ତରୁ ଜଣାପଡ଼ିଛି ଯେ ଡ୍ରାଇଭର ପ୍ରବଳ ସ୍ରୋତ ମଧ୍ୟରେ ଶୀଘ୍ର ନାଳ ପାର ହେବାକୁ ଚେଷ୍ଟା କରିଥିଲେ, ଯାହା ଫଳରେ କାରଟି ଫସି ଯାଇ ଭାସି ଯାଇଥିଲା। ଦୁର୍ଘଟଣାର ସଠିକ୍ କାରଣ ତଦନ୍ତ କରାଯାଉଛି। ପୁଲିସ ଅଧିକ୍ଷକଙ୍କ ଅନୁଯାୟୀ, ଦୁର୍ଘଟଣାରେ ତିନି ଜଣ ଶିଶୁ, ଦୁଇ ଜଣ ମହିଳା ଏବଂ ତିନି ଜଣ ପୁରୁଷଙ୍କ ମୃତ୍ୟୁ ହୋଇଛି। ସମସ୍ତ ମୃତକ ଓଡ଼ିଶାର ବାସିନ୍ଦା। ପ୍ରଶାସନ ଏବଂ ପୁଲିସ ଦଳ ସମ୍ପୂର୍ଣ୍ଣ ଘଟଣାର ତଦନ୍ତ କରୁଛନ୍ତି।